Ի՞նչ փոխել Սևանում

Գնալով Սևանում հանգստացողների թիվը պակասում է: Շատերն այս փաստը կապում են Սևանի նկատմամբ իրականացվող սև փիարի հետ: Ամեն ամառ մի արտասովոր բան հորինում ու տարածում են ժողովրդի մեջ: Այս տարի էլ այդպես եղավ: Կանաչ Սևանի մասին լուրերը շատ արագ տարածվեցին, բայց իրականում այն լողափերը, որ հիմնականում ընդունում են հանգստացողներին, բավականին մաքուր էին: Մաքուր էին, բայց հանգստացողներ չկային: Հիմա արդեն ամբողջ լրատվամիջոցները գովում են Սևանը, ասում, որ մաքուր է: Բայց խնդիրներ կան, որոնք հետ են պահում հանգստացողներին:

Իսկ ի՞նչ փոխել Սևանում

1. Իջեցնել գները:
   Սևանում և Վրաստանում հանգստի գները գրեթե նույնն են, և երբ նախատեսում են գոնե մեկ շաբաթ հանգստանալ, ընտրում են Վրաստանը: Սևանն առավելություն ունի միայն հեռավորության տեսանկյունից, ու Սևան գալիս են հիմնականում մինչև մեկ շաբաթ հանգստացողները:
2. Ավելացնել հարմարավետությունը:
   Լողափերին գտնվող տնակների շարքում դեռ կան տնակներ, որոնք տարրական սանհանգույց չունեն: Իսկ այն տնակները, որոնք ունեն, համարում են դա շատ մեծ առավելություն ու դրա համար կրկնակի գին ուզում:
3. Ունենալ ճաշարաններ:
   Եթե մարդ մեկ-երկու օրից ավել է նախատեսում հանգստանալ, իր համար սնվելն արդեն խնդիր է դառնում: Շատ քիչ լողափեր ունեն ճաշարաններ: Իսկ միջին եկամուտ ունեցող ընտանիքի համար ամեն օր ռեստորանում սնվելը այդքան էլ հարմար չէ:
4. Կազմակերպել ուղևորափոխադրում:
   Լինի մատչելի տրանսպորտ, որը օրվա մեջ գոնե մեկ անգամ կհասցնի Երևանից միչև լողափ:
5. Թարմացնել տնակների կահույքը:
   Տնակներում հիմնականում տեղադրված է այն կահույքը, որն արդեն տանից դուրս են հանել ու ,մեղմ ասած, օգտագործման համար այդքան էլ հարմար չէ:
6. Հետևել մաքրությանը:
   Ամեն հանգստացողից հետո մանրակրկիտ մաքրեն սենյակները և փոխեն սպիտակեղենը: Եթե ընդհանուր զուգարան կա լողափում, գոնե ժամը մեկ մաքրեն:
7. Կազմակերպել տարբեր մարդկանց համատեղ հանգիստը:
   Լողափում ամեն անկյունից հնչող տարբեր տեսակի երաժշտությունը խանգարում է հանգստանալ: Ճիշտ կլինի ունենալ ընդհանուր կայանատեղի, որտեղ կկանգնեն բոլոր մեքենաները, ու տաղավարները տեղակայված կլինեն ավելի հեռու մեքենաներից: Իսկ տաղավարներն էլ իրարից մի քիչ հեռու լինեն, որ մի տաղավարի արդեն գինովցած հանգստացողների աղմուկը չխանգարի մյուս տաղավարի հանգստացողներին:
8. Բարձրացնել անձնակազմի որակը:
   Մի քիչ ժպիտով, գրագետ, կոկիկ տեսքով, ինչու չէ միանման համազգեստով աշխատակիցները ավելի կբարձրացնեն ձեր լողափի նկատմամբ վստահությունն: